25/10/2025
📢 راهو مهم برشة نحكيو على احترام البروتوكول في التشخيص 👇
إذا شكّيت اللي صغيرك يمكن يكون عندو طيف توحد، بالله ما تمشيش مباشرة للرقية الشرعية ولا للخزعبلات، ولا حتى لأي أخصائي نطق ولا علاج وظيفي ولا اخصائي حركي نفسي ولا حتى مربي مختص.
❗نحب نوضّح حاجة: فمّا فرق كبير بين المربي العادي و المربي المختص. المربي المختص عندو قراية جامعية واختصاص بعد الباك، مش أي حد يقول "نخدم مع صغار" معناها فاهم. وكل اللي ذكرتهم قارين بعد الباك ومختصين مش عاملين كوتشينج وريق.
👩⚕️ التوجّه الصحيح هو لطبيب نفسي للأطفال، هو الوحيد اللي عندو الحق يعمل التشخيص الأوّلي، ويأكد إذا كان صغيرك عندو توحد ولا لا، وإلا شنوة الدرجة متاعو.
وهو الوحيد اللي ينجم يوصف دواء إذا الحالة تستحق، وهو الوحيد اللي يعرف بالضبط لشكون يوجّهك بعد، حسب احتياجات صغيرك: أخصائي نطق، علاج وظيفي، أو غيرو.
🚫 ما تبداوش تنڨزو من واحد للآخر، وكل واحد يعطيكم كلام، وتضيعو الوقت الثمين على صغيركم.
⏳ العمر يجري، وكل تأخير يأثر.
وإذا تلقى حد يقولك “هات نداوليك صغيرك” من غير ما يقلك. أمشي لطبيب. مختص واللي هو pédopsychiatre طب النفسي للأطفال، أهرب منّو!
راهو مش لأنو يخدم، معناها فاهم.
اللي ما يحترمش البروتوكول ولا أخلاقيات المهنة، ما يستحقّش الثقة.
❤️ صحة صغاركم غالية، ما هيش لعبة وما تتشراش وفلوس الدنيا، اذا عند ظروف مادية متواضعة فمة أهم واقوى قسم الطب النفسي للاطفال في مستشفى الرازي بمنوبة ، أطباء اكفاء وديمة في بحث وعندهم الجديد في آخر الابحاث و فمة زادة قسم الطب النفسي للاطفال بمستشفى المرسى. و فمة العيادات الخاصة. منيش باش نذكر اسماء لأن الغاية توعوية مش اشهار.
