02/02/2025
PANAWAGAN PARA SA MAAYOS NA LANSANGAN
SA LALAWIGAN NG QUEZON
Kami, obispo, mga pari, mga relihiyosa, at mga lider-layko ng Diyosesis ng Gumaca at mga mamamayang Pilipino, ay nananawagan para sa maayos na mga pangunahing lansangan sa lalawigan ng Quezon.
Nanawagan kami sa lahat ng ahensya ng pamahalaan upang tugunan ang suliraning nagdala ng kahihiyan sa Quezon bilang probinsya na may pinakamasasamang highway sa CALABARZON. Nag-aanyaya rin kami sa iba’t ibang sektor ng lipunan para sa sama-samang pagninilay at pagpapahayag ng saloobin ukol sa mga baku-bakong lansangan at mga kaugnay na usapin.
Bilang isang sambayanan, naglalahad kami ngayon ng bukas na liham sapagkat malinaw na hindi napapakinggan ang hinaing ng mga mamamayan sa social media. Pang-araw-araw nang viral sa Facebook ang mga reklamong may kasama pang larawan at video ng mga sira-sirang daan, heavy traffic, mga nabubulok na produkto, at mga aksidente. Higit pang nagte-trending ang ganitong reklamo kapag dumadagsa ang mga byahero tuwing Undas at Pasko. Nitong nakaraang taon, marami ang nagpasiyang hindi na umuwi sa mga probinsya dahil sa takot na maulit ang mga napakasasamang karanasan sa pagdaan sa mga highway ng Quezon.
Kung may tugon man sa mga hinaing, ang mga ito ay pawang gamot-kabayo at panakip-butas lamang. Tinatapalan ng lupa ang mga butas ng aspalto. Nagkakaroon din ng pag-aaspalto upang takpan ang mga wasak na kongkreto sa ilalim. Manaka-naka ay nagkakaroon ng mga pagbubungkal ng semento, subalit bago matapos ang buong proyekto, bitak-bitak na ang semento ng mga naunang bahagi. Ang mga ito ay panandalian at tingi-tinging solusyon sa mga suliranin, subalit walang pangmatagalang pagsasaayos.
Sama-sama kaming nagpapahayag sapagkat malinaw na hindi sapat ang aming hiwa-hiwalay na paglapit sa mga namamuno sa probinsya at sa mga bayan, pati na rin sa mga inhinyero ng DPWH. Ang karaniwang tugon na aming nakukuha mula sa kanila ay:
“Walang budget.”
“Hindi sakop ng kanilang opisina ang maintenance and repair ng partikular na bahagi ng Quezon highway.”
“Wala silang kakayanang ayusin ang sira-sirang highway.”
Hindi namin maiwasang magtanong, “Bakit, sa pangkalahatan, higit na malalapad, makikinis at kaaya-ayang maglakbay sa mga highway ng ibang lalawigan ng CALABARZON?”
Hindi lamang usapin ng transportasyon ang sira-sirang highway dito sa Quezon. Sintomas ito ng mas malalalim na problema ng politika sa buong bansa. Ipinapakita nito na political survival ang pangunahing agenda ng mga may-kapangyarihan. Ginagamit nila ang yaman ng bayan para makapanatili sa kapangyarihan habang kinakaligtaan ang pangkalahatang kabutihan, lalo na ng mga higit na nangangailangan.
Naniniwala kami na kailangan ng tapusin ang pananahimik sa harap ng mga hinaing ng bayan. Kailangang magkaroon ng tinig ang ating pananampalataya sa mga talakayang panlipunan. Pinanghahawakan namin ang likas na kabutihan at malasakit ng mga taong nasa gobyerno. Umaasa din kami na marami ang handang makipagtulungan upang isulong ang mabuti at pigilan ang lumalaganap na sistema ng kurapsyon sa ating minamahal na bayan.
Ipinahayag ngayong ika-2 ng Pebrero, 2025.
(Sgd.) Lubhang Kgg. Euginius L. Cañete, M.J., D.D.
Obispo ng Diyosesis ng Gumaca
