26/06/2024
Хэрэв би 6-р тойрог буюу Хэнтий, Дорнод, Сүхбаатарын сонгогч байсан бол эхний 3 сонголт энэ байна.
1. Ардчилсан намаас нэр дэвшигч Шинэбаярын Бямбасүрэн Аавынх нь ажил явдал дээр анх таарч байлаа. Уулзаж ярилцаж сүйд болж үзээгүй ч би түүнийг эцгээр нь баримжаалж шударга зөв залуу гэдэгт эргэлзэхгүй байна. Талийгаач Шинэбаяр ахтайгаа олон ч тэмцэлд хамтран зүтгэж байлаа. Түүний тууштай, зарчимч, үнэнч... олон сайхан чанарууд хүүд нь өвлөгдсөн нь эргэлзээгүй. Алим модноосоо хол унадаггүй дээ.
2. Төрболдын Бат-Оргил Амин хувийн хэргийн төлөө биш ард түмэн, эх орны төлөө байнгын санаа чилээдэг, Яах вэ?!... гэж боддог, бас үйлдэх гэж хичээдэг сэхээтэн залуу. Би ийм хүмүүсийг хүндэлж өөр тавцанд тавьж хардаг. Энэ бол төрөөр сэтгэж байна гэсэн үг! Энэ удаа Үндэсний эвслээс нэр дэвшиж байгаа юм байна. Амжилт!
3. Эргэлзээгүй нэг сонголт Ерөнхий сайд Л. Оюун-Эрдэнэ. Ерөнхий сайдын сэнтийд очмогц элдэв сайхан санал тавих гээд үүдийг нь сахидаг хөрөнгөтнүүдийн саналыг нэг нэгээр нь хүлээж аваад, байдаг л нэг ерөнхий сайд подхийтэл хийчихээд суудлаа өгч болох л байсан байх. Харин тэр эрсдэл хийсэн. Системээ нь бүхлээр нь нэг хараад, эд ангиар нь салгаж нэг ойлгоод өөрчлөх гэж зорьсон. Эхэндээ ч би ингэж бодоогүй л дээ, моодонд орсон гаднын тавиул, Харвардын жүжигчин, АХ НАРын залгамжлагч гэж эргэлзээгүй бодсон. Гэтэл ажиглах тутам арай л өөр байгаа. Хамгийн гол нь нүүрс, алт, зэс, уурхай...элдэв бизнестэй ер хутгалдахгүй, өөрөө цэвэр байгаад байна. Тэр яг л нэг юм хийх гээд шийдчихээ юу гэж би бас горьдоод байгаа. Горьдлого талаар болох юм уу, биелэх юм уу бүү мэд. Ирээдүйг нь хэлж мэдэхгүй юм даа, одоохондоо бол тэр гарцаагүй зөв байна. Яг ингэж харвал нүдээ аниад багаар нь сонгочихмоор! Бидний сонголт ч бас л эрсдэл шүү дээ!
Тэр эрсдэл хийчихлээ. Гаднаас биш нам дотроо илүү дайсантай болчих шиг боллоо доо! Би эрсдэл хийдэг хүмүүст дуртай. Тэд алдвал алдана, эсвэл томоор урагшлуулдаг.
