09/01/2021
မင်္ဂလာတရားနှင့်နိုင်ငံတော်အပိုင်း (၈)
မြတ်စွာဘုရားမိန့်တော်မူသည့် မင်္ဂလာတရားတော်နှင့်အညီ ဝင်ငွေကို စီမံခန့်ခွဲနည်း
-------------------------------------------------------------
မင်္ဂလာတရားနှင့် နိုင်ငံတော် အပိုင်း (၈)
သန္တုဌိ ရောင့်ရဲတယ်ဆိုတာက ပိုက်ဆံမရှာနဲ့တော့ ဒီလောက်တော်ပြီ။ ဒီလိုပြောတာမဟုတ်ဘူး။ amount ကိုပြောတာမဟုတ်ဘူး၊ အတိုင်းအတာကိုပြောတာမဟုတ်ဘူး၊ ရှိတဲ့အရာကို သူက ပီတိဖြစ်တာ၊ ရှိတဲ့အရာကို သူက ခံစားနိုင်တာ၊ Enjoy လုပ်နိုင်တာ၊ ပိုက်ဆံရှာတဲ့နေရာမှာ ဗုဒ္ဓမြတ်စွာက "သေဒါဝက္ခိတ္တေဟိ - ချွေးဒီးဒီးကျအောင် လုပ်ပါ၊" နောက်ပြီးတော့ ဘယ်လောက်အထိရှာရမှာတုန်း ? တစ်နေ့တစ်နေ့တာ ကိုယ်ဘယ်လောက်အထိ သုံးတုန်း၊ တစ်နေ့ကို ငါးထောင်သုံးတယ်ဆိုရင် ရေဖိုး မီးဖိုး အခွန်ဖိုး စားဖို့သောက်ဖို့ ငါးထောင်ကျတယ်ဆိုရင် တစ်နေ့တစ်နေ့ကို နှစ်သောင်းဝင်ငွေရှိရမယ်တဲ့။ ဗုဒ္ဓမြတ်စွာဘုရားက မိန့်ထားတာနော်၊ ဝင်ငွေ နှစ်သောင်း - တစ်သောင်းကိုကျတော့ အရင်းအနှီးထဲပြန်ထည့်ရမယ်တဲ့၊ စီးပွားရေးလည်ပတ်အောင် အဲဒီအထဲမှာ ထည့်ရမယ်တဲ့၊ နောက်ကျန်တဲ့ ငါးထောင်ကျတော့ ဘဏ်ထဲမှာ အခုခေတ် စကားပြောရင်တော့ bond ခေါ်တာပေါ့၊ အဲဒီ security အနေနဲ့ထားမယ်တဲ့။ အရေးပေါ်သုံးဖို့ အတွက်ထားရမယ်တဲ့။ emergency အနေနဲ့၊ contigency အနေနဲ့လဲ သုံးတယ်။ အဲဒီတော့ လေးပုံထားတယ်၊ အဲဒီတော့ စားဖို့သောက်ဖို့ရော တစ်နေ့တစ်နေ့မှာ ကိုယ်က တစ်သိန်း သုံးဖို့လိုအပ်တယ်ဆိုရင် အဲဒီပုဂ္ဂိုလ် ဝင်ငွေ လေးသိန်းရှိအောင် ကြိုးစားရမယ်တဲ့။ ဗုဒ္ဓမြတ်စွာဘုရားက မိန့်တာ။
ဒါဖြင့် သန္တုဌီ - ရောင့်ရဲရမယ်ဆိုတဲ့ဟာနဲ့ ဘယ်လိုဆက်စပ်ယူရမှာလဲဆို ရောင့်ရဲတယ်ဆိုတာက ကိုယ့်လက်ထဲမှာ ရှိတဲ့ဟာကို မုဒိတာဖြစ်နိုင်တာ၊ လက်ထဲမှာရှိတာကိုကြည့်ပြီးတော့ စိတ်ထဲမှာပျော်ရွှင်တာ၊ ဘုန်းဘုန်းရေးထားတဲ့စာအုပ်ထဲမှာ "ပျော်နိုင်ပါရဲ့နဲ့ပျော်ဖို့မေ့နေသူများ"ဆိုတာ ဒီအချက်လေးကိုပြောတာပါပဲ။
လူအများစုက ကိုယ့်လက်ထဲမှာရှိတဲ့ဟာဆို တန်ဖိုးမထားဘူး၊ သူများလက်ထဲမှာရှိတဲ့ဟာကိုမှ သူက ရချင်တာ၊ အဲဒါကျတော့ စိတ်ပိုင်းဆိုင်ရာ ဝိသမလောဘဖြစ်သွားပြီ။ သူ့မှာဘယ်လောက်ရှိတယ် မရှိဘူးဆိုတာ၊ လုံလောက်တယ် မလုံလောက်ဘူးဆိုတာ မဆိုင်တော့ဘူး၊ စိတ်ပိုင်းဆိုင်ရာ psychological setup နဲ့ psychological mindset နဲ့ ဆိုင်သွားတာ၊ ဒါလေးတစ်ခုပြောပြချင်တာ။
"ကာလေနဓမ္မဿဝနံ" ဆိုတာက ခုနတုန်းက ဘုန်းဘုန်းပြောတဲ့ Growth mindset ရှိတာကိုပြောတာ။ ငါ့မှာ တိုးတက်ဖို့လိုအပ်နေသေးတယ်၊ အဲဒီလိုမြင်တဲ့ပုဂ္ဂိုလ်၊ အဲဒီလိုမြင်တဲ့ပုဂ္ဂိုလ်ကျမှ သူများရေးတဲ့စာအုပ်တွေ ဖတ်ချင်တယ်၊ သူများပေးတဲ့ lecture တွေ နားထောင်ချင်တယ်၊ ဘုန်းဘုန်းက နေ့တိုင်းတခြားဆရာတော်တွေ ဟောတဲ့တရား နေ့တိုင်းနားထောင်တယ်နော်၊ ဘုန်းဘုန်းက နေ့တိုင်းနားထောင်ပါတယ်။ နောက်စာအုပ်တွေလည်းပဲ မြန်မာလိုစာအုပ်တွေ၊ အင်္ဂလိပ်လိုစာအုပ်တွေ၊ ပါဠိလိုစာအုပ်တွေ နေ့တိုင်းဖတ်တယ်။ ဘာဖြစ်လို့တုန်းဆိုတော့ ငါ့မှာရှိတဲ့ဗဟုသုတ လုပ်တဲ့နေရာမှာ မလုံလောက်သေးဘူးလို့ ကိုယ့်ဟာကိုယ်ယူဆထားတာ။ အဲဒီလိုယူဆထားတဲအတွက်ကြောင့်မို့လို့ ဖြည့်ရမယ် ဖြည့်ရမယ်ဆိုတဲ့ Growth Mindset အဲဒီစိတ်လေးထားတာ၊ ဒါကြောင့် "ကာလေန ဓမ္မဿဝနံ" ဆိုတာကအချိန်ယူပြီးတော့ လေ့လာပါလို့ပြောတာ၊ ဒီနေရာမှာ တရားပဲဖြစ်ဖြစ်၊ ကိုယ်နဲ့ဆိုင်ရာ ဘာသာရပ်ပဲဖြစ်ဖြစ်၊ ကိုယ့်နိုင်ငံအကြောင်းပဲဖြစ်ဖြစ် အဲဒါလေ့လာပါလို့ပြောတာ။
တကယ်စာတတ်တဲ့ ဆရာတော်ကြီးတွေကို ဘုန်းဘုန်းက ချဉ်းကပ်ဖူးတယ်၊ သီရိလင်္ကာမှာ နေတုန်းကဆိုရင် ပါမောက္ခ ချုပ်ဆရာတော်ကြီး ဒေါက်တာနန္ဒမာလာဘိဝံသ ဘုန်းဘုန်းတို့ထက် နှစ်တန်းကြီးတယ်၊ ဆရာတော်ကြီး ဗဟုသုတများတယ်ဆိုတာ သူ့စိတ်ဓါတ်ကိုက သူရဲ့ ဗဟုသုတက မပြည့်စုံသေးဘူးလို့ အဲဒီလိုယူဆထားတာ၊ အဲဒီလိုယူဆထားပြီးတော့ အဲဒီကတည်းက သူက အမြဲတမ်းစာပဲကြည့်နေတာ၊ အင်္ဂလိပ်လို ဖတ်လိုက်၊ ပါဠိလိုဖတ်လိုက်၊ ပါဠိလိုဖတ်တာကလည်း တစ်ခါပြီး နောက်တစ်ခါထပ်ဖတ်လိုက်၊ တစ်ခုခုလိုတယ်ဆိုရင် ဘုန်းဘုန်းတို့က သူ့ဆီပြေးသွားပြီးတော့ ဆရာတော် ဒီအကြောင်းဘယ်နေရာမှာရှိတုန်း မေးလျောက်ရင် ချက်ချင်းပြန်ပြောနိုင်တယ်၊ တကယ့် mobile library ဆိုတာ ရွှေ့လျားစာကြည့်တိုက်လိုပဲ၊ သွားပြီးတော့ မေးလိုက်တယ်ဆို အဲလိုမျိုး သိတာ၊ ထေရဝါဒတက္ကသိုလ်မှာလည်းပဲ ဗန်းမော်ဆရာတော်ကြီးပေါ့နော်၊ ဥက္ကဌဆရာတော်ကြီး ပါမောက္ခချုပ်လုပ်တုန်းကဆို အဲဒီလိုပဲ ဆွမ်းဘုဉ်းတဲ့အခါမှာဆို တစ်ခါတည်း ဆရာတော်ကြီး တပည့်တော် ဒီအကြောင်းသိချင်တယ်ဆိုရင် ဟာ .. ဘယ်နေရာမှာသွားကြည့်၊ ချက်ချင်းရတယ်။ ဒါပေမဲ့ ဗန်းမော်ဆရာတော်ကြီး သူ့အခန်းထဲမှာသွားကြည့် စာအုပ်တွေ ပြည့်ပြီး အမြဲတမ်းကြည့်နေတယ်၊ Growth Mindset ရှိတာကိုပြောတာ။ အဲဒီဆရာတော်ကြီးတွေဟာ "ကာလေန ဓမ္မဿဝနံ" အဲဒီစိတ်ဓါတ်က ရှိနေတယ်။
တစ်ခါတစ်ခါ ဘုန်းဘုန်းက သတင်းပြန်ကြားတဲ့အခါမှာ လန့်တောင် လန့်သွားတယ်၊ တချို့ဆရာတော်ကြီးတွေက ဘုန်းဘုန်းရဲ့တရားကို နားထောင်တယ် ဆိုတာလေ၊ နာကြည့်တယ်ပေါ့။ နောက် တချို့ နံမည်ကြီးတဲ့ဆရာတော်တွေ သက်တော်သိပ်မကြီးသေးဘူး၊ နားထောင်ကြည့်တယ်ဆိုတာ ...
သြော် ဒီဆရာတော်တွေ တိုးတက်တယ်၊ အလုပ်လုပ်နိုင်တယ်ဆိုတာ ဒီစိတ်ဓါတ်ရှိနေလို့။ သီတဂူဆရာတော်ကြီးက သူ့ထက်ဝါ (၂၀) လောက်ကြီးတဲ့ ဆရာတော်ကြီးတွေကို ပင့်ပြီးတော့ သီရိလင်္ကာနဲ့ အိန္ဒိယ ဘုရားဖူးလိုက်ပို့တာတဲ့။ ဒါဘုန်းဘုန်းတို့ သီရိလင်္ကာမှာ ရှိတဲ့အချိန်ပေါ့။ ပြီးခဲ့တဲ့ ၂၇ နှစ်၊ ၂၈ နှစ်လောက်ကပေါ့။ ပဲခူး ကြခတ်ဝိုင်းဆရာတော်ကြီးက သီတဂူဆရာတော်နဲ့ နီးနီးကပ်ကပ် တစ်ခါမှ မနေဖူးဘူး၊ အဲဒါနဲ့ ဘုရားဖူးသွားကြတဲ့အခါကျတော့ သီတဂူဆရာတော်က တစ်နေကုန် အလုပ်လုပ်တယ်၊ အားတဲ့အခါ စာဖတ်တယ်၊ ညဆို ၁၂ နာရီလောက်မှ ကျိန်းတယ်၊ မနက် လေးနာရီလောက်ကျတော့ ထပြီးတော့ အလုပ်လုပ်နေပြီ။ အဲဒါနဲ့ ကြခတ်ဝိုင်းဆရာတော်က ဘာမိန့်တုန်းဆိုတော့ သီတဂူဆရာတော် ဒီလောက်နံမည်ကြီးတာ နည်းနေတယ်တဲ့။ သူက အရမ်းကြိုးစားတာကိုး။ နေ့တိုင်း နေ့တိုင်း သူကိုယ်တိုင် စာကြည့်ရုံတင်မက,ဘူး။ သူ့တပည့်တွေကိုပါ စာကြည့်ခိုင်းတယ်၊ ငါ့ကို ဒီဟာလေး ရှာပေးပါအူးပေါ့။ သီတဂူ ဆရာတော်ကြီးက သူ့ကို စာကြည့်ပေးတဲ့ ပုဂ္ဂိုလ်တွေရှိတယ်။
ဘုန်းဘုန်းကလည်း ဘုန်းဘုန်း ဒီလောက်စာကြည့်တာတောင်မှ ကိုယ့်ကို စာကြည့်ပေးတဲ့ သာမဏေကျော် ကိုယ်တော်လေးတွေ၊ နောက် PhD ကိုယ်တော်လေးတွေ အနားမှာရှိတယ်၊ ငါ ဒါလေးကြည့်ချင်တယ်၊ ဒါလေး လိုက်ရှာပေးပါ။ သူတို့ကို ဆရာတင်တယ်၊ အဲဒီလိုပေါ့။
၂၀၂၀ ခုနှစ် ဒီဇင်လာလ ၂၂ ရက်နေ့တွင် မင်္ဂလာဖောင်ဒေးရှင်း ၁၃ နှစ်ပြည့်အထိမ်းအမှတ်ဖြင့် ဟောကြားသော "မင်္ဂလာတရားနှင့် နိုင်ငံတော်" တရားတော်မှ ကောက်နှုတ်ရေးသားပူဇော်ပါသည်။ ဆက်လက်ဖော်ပြပါမည်။
