24/07/2022
Mi Account ဆိုတာဘာလဲ ? ဘယ်လိုအရေးပါလဲ ?
ကျွန်တော်ဟိုတလောက Apple ID နဲ့ iCloud အကြောင်းကိုရှင်းပြခဲ့တုန်းကလိုပဲ အခုတစ်ခါမှာလည်း Xiaomi နဲ့ Redmi ဖုန်းတွေမှာ တွေ့ရ၊သုံးရတဲ့ Mi Account အကြောင်းကို အနည်းငယ်ပြောပြပေးချင်ပါတယ်။
Mi account ဆိုတာ တရုတ်နိုင်ငံအခြေစိုက် Xiaomi Inc. ကနေထောက်ပံ့ပေးထားတဲ့ နည်းပညာအထောက်အပံ့ Account တစ်ခုဖြစ်ပါတယ်။ Xiaomi နဲ့ Redmi ဖုန်းတွေမှာ App တွေ၊ Theme တွေ၊ Features တွေ၊ Mi Cloud Data တွေ စသဖြင့် Xiaomi ရဲ့ နည်းပညာတွေ အသုံးပြုမယ်ဆိုရင်တော့ Mi Account တစ်ခုက မဖြစ်မနေလိုအပ်ပါတယ်။
လွယ်လွယ်ပြောရရင်တော့ Mi Account ဆိုတာ သာမန်ဖုန်းတစ်လုံးမှာထည့်ထားလေ့ရှိတဲ့ Google Account တစ်ခုလိုပါပဲ။ Google Account တစ်ခုဟာ ဖုန်းတစ်လုံးအတွက်မရှိမဖြစ်လိုအပ်သလို Xiaomi နဲ့ Redmi ဖုန်းတွေမှာလည်း Mi Account တစ်ခုမရှိမဖြစ်လိုအပ်ပါတယ်။
Mi Account ရှိရင် ဘာလုပ်လို့ရလဲ?
>> ကိုယ်အသုံးပြုနေတဲ့ ဖုန်းမှာရှိတဲ့ Call Log မှတ်တမ်းတွေ၊ အသံသွင်းထားတဲ့ Record အသံဖိုင်တွေ၊ ဓာတ်ပုံတွေ၊ စာတို Message တွေနဲ့ Contact တွေအားလုံးကို Account နဲ့ချိတ်ဆက်ပြီး Mi Cloud ထဲမှာ မပျောက်ပျက်အောင်ထိန်းသိမ်းထားနိုင်တာ
>> အကယ်၍ ဖုန်းပျောက်သွားတယ်ဆိုရင်လည်း Mi Account ကနေတစ်ဆင့် ဖုန်းကိုခြေရာခံပြီးတော့ပြန်ရှာနိုင်သလို အဝေးကနေ အချက်အလက်တွေဖျက်ပစ်နိုင်တာမျိုး ၊ ပျောက်သွားတဲ့ဖုန်းကို အဆက်မပြတ် Alarm မြည်နေအောင်လုပ်လို့ရတာမျိုး လုပ်နိုင်တာ
>> ဖုန်းထဲက အချက်အလက်တွေကို မတော်တဆ ဖျက်မိသွားတာမျိုးဖြစ်ခဲ့ရင်လည်း Trash ကနေတစ်ဆင့် ပြန်လည် Recover ယူနိုင်တာ
>> Xiaomi ဖုန်းအဟောင်းကနေ အသစ်တစ်လုံးပြောင်းရင်လည်း ဖုန်းထဲမှာရှိတဲ့ Data တွေကို တစ်ခုချင်း ပြန််ရှာကူးနေစရာမလိုဘဲ မိနစ်အနည်းငယ်အတွင်း ဖုန်းအသစ်ဆီကိုပို့လို့ရတာ စတာတွေပဲဖြစ်ပါတယ်။
Mi Account ဖွင့်ရတာခက်လား ?
မခက်ပါဘူး။ Mi Account ဖွင့်မယ်ဆိုရင်တော့ https://account.xiaomi.com ဆိုတဲ့ Website ထဲကိုဝင်ပေးပါ။ ပြီးရင်တော့ Sign in to your Mi Account ဆိုတာလေးကို တွေ့မြင်ရမှာပါ။ Create Mi Account ကိုနှိပ်ပေးပါ။ ဒီနေရာမှာ Account ဖွင့်ဖို့အတွက် နည်းလမ်း (၂) ခု ရှိပါတယ်။ Email နဲ့ ဖုန်းနံပါတ် ကြိုက်နှစ်သက်ရာတစ်ခုနဲ့ဖွင့်နိုင်ပါတယ်။ Password ကိုလည်းအမြဲသတိတရဖြစ်နေမယ့်ဟာ ထားတာအကောင်းဆုံးပါပဲ။
Mi Account ရှိမှရမှာလား ?
Mi Account မရှိပဲ ဖုန်းသုံးလို့ရလားဆိုရင်ရပါတယ်။ ဖုန်းကိုသာမန်အသုံးပြုသူအနေနဲ့ Mi Account က အထူးတလည်မလိုအပ်ပါဘူး။ ဒါပေမဲ့ကိုယ့်ဖုန်းကို ဒီထက်ပိုပြီး လုံခြုံစိတ်ချရဖို့အတွက်ဆိုရင်တော့ Mi Account ဟာ မဖြစ်မနေအရေးပါပါတယ်။
မိမိအတွက်အရေးကြီးတဲ့ ဖုန်းနံပါတ်တွေ၊ Message တွေ၊ ကိုယ်ရေးကိုယ်တာ ဖိုင်တွေ၊ မီဒီယာဖိုင်တွေကို သိမ်းဆည်းနိုင်တာနဲ့ နောက်ဆုံး ဖုန်းပျောက်သွားခဲ့ရင်တောင် Find Device Mode နဲ့ပြန်ရှာနိုင်လို့ပါ။ ဒါ့အပြင် ဖုန်းပျောက်သွားခဲ့ရင်လည်း ဖုန်းထဲမှာရှိတဲ့ အရေးကြီးတဲ့ Data တွေကို အခြား Device တစ်ခုကနေ Sign In ဝင်ပြီး One Click Delete လုပ်နိုင်ပါသေးတယ်။ ဒါကြောင့် ဖုန်းတစ်လုံးမှာ Data တွေသိမ်းထားတတ်တဲ့ Xiaomi User တွေအနေနဲ့ Mi Account က အသက်တမျှအရေးကြီးပါတယ်။
နိဂုံးချုပ်အနေနဲ့အကြံပေးရရင် Xiaomi ဒါမှမဟုတ် Redmi ဖုန်းတစ်လုံးလက်ထဲရှိရင်တော့ Mi Account နဲ့ ချိတ်ဆက်ပြီးအသုံးပြုသင့်ပါတယ်။ Account ဖွင့်ထားတဲ့ Email, Phone နဲ့ Password တို့ကိုလည်း မမေ့မလျော့သတိရနေဖို့ လိုတယ်ဆိုတာကို ပြောပြရင်း အဆုံးသတ်ပါမယ်ခင်ဗျာ။ အဆုံးထိဖတ်ပေးတာ ကျေးဇူးအများကြီးတင်ပါတယ်။
