20/07/2026
លោកអ៊ំ🙏🥹
រាល់ការព្រាត់ប្រាស់មនុស្សជាទីស្រលាញ់ទាំងឡាយ តែងបន្សល់នៅក្តីឈឺចាប់ ភាពសោកសង្រេង ទុក្ខសោក ស្រណោះស្រណោក ល្វឹងល្វើយ សង្វេគក្នុងចិត្តណាស់ ពេលណាគិតដល់របត់ជីវិតនៃធម្មជាតិដែលនឹងត្រូវជួបជៀសមិនផុតនេះ។ បើធម្មជាតិនេះចេះធ្វើឱ្យមនុស្សយោលយោគជ្រកក្នុងសម្បកជីវិតសត្វថ្មី ចាំនៅរឿងរ៉ាវកាលពីមុនៗរាប់លានកោដិជាតិក្នុងសម្បកជាជីវិតសត្វក្នុងសម្បកមុនៗ ហើយរាប់តែសម្បកជាមនុស្សនេះបានហើយ ម្ល៉េះមនុស្សមិនពុលនឹងរឿងតណ្ហាគ្រប់យ៉ាង មានលុយ មានរូប មានសម្ផស្សស្អាត រឿងបង្កើតកូន មានទេពកោស្យ ឆ្លាត ពូកែ មានជំនាញអ្វីមួយ ហើយពុលនឹងជំនាញនោះ ល្បីមុខមាត់ តំណែងតួនាទី ល្បែងលោកិយគ្រប់យ៉ាងដែលបំពុលមិនឱ្យមនុស្សមើលឃើញការពិតពីជីវិតនេះ ថាជាទុក្ខ ជារឿងគ្មានន័យ គ្មានខ្លឹមសារទេ តែធម្មជាតិនេះមិនដូច្នោះឯណា រាល់ការចាំទាំងឡាយ ចាំបង ចាំប្អូន ឪពុកម្តាយ មនុស្សជាទីស្រលាញ់ កន្លែងដែលខ្លួនរស់នៅដោយសុខសាន ទីកន្លែងដែលដិតដាមជាប់អនុស្សាវរីយ៍ សូម្បីមនុស្សដែលខ្លួនស្អប់ ក៏ពេលចាកចោលសម្បកជាមនុស្សនេះទៅ ការចាំនៅសាច់ខួរដេកដួលចោលនៅលើផែនដីអត់យកទៅបានទាំងអស់ ចិត្តអន្ទោលក្នុងសម្បកថ្មីអត់ចាំរឿងរ៉ាវពីមុនឡើយ ជាប់តាមក្នុងចិត្តតែសភាពចាំនៅក្នុងខ្សែវិញ្ញាណដែលដិតដាមជាប់ពីកាលនៅសម្បកមុន ហើយចាំនេះ ទាល់តែយល់បានកើតជារូបារម្មណ៍ក្នុងចិត្ត ទើបតទៅសម្បកបន្ទាប់អាចចាំបានខ្លះ តែចាំជាសភាពទៅទៀតក្នុងសម្បកថ្មី ជួបរឿងអីមួយចិត្តចេះតែបណ្តាល ឱ្យគិតៗទៅយល់។ គិតតាមដំណើរធម្មជាតិនេះទៅមើល ទទួលអារម្មណ៍ថា ធម្មជាតិនេះសាហាវ ឥតធម៌មេត្តាប៉ុណ្ណា? បែកបាក់ព្រាត់គ្មានលើកលែងអ្នកណាឡើយ ហើយផ្សងជាតិក្រោយជួបគ្នាទៀត តែធម្មជាតិនេះមិនតម្រូវអាចតាមចិត្តប៉ងបានឡើយ រាប់លានកោដិផែនដី មិនដឹងផ្ទុះបែកប៉ុន្មានដង ទើបមានឪកាសបានជួបគ្នាទៀត អត់អាចជួបហើយ ថែមទាំងការចាំអនុស្សាទាំងប៉ុន្មាន អត់ចាំទៅទៀត អ្នកនៅរស់យំ ទួញសោក អ្នកស្លាប់ទៅ ឥតដឹងអ្វីទាំងអស់ ដឹងក្នុងសម្បកថ្មី សាងអនុស្សាថ្មី។ នេះហើយធម្មជាតិ៕
