03/08/2026
الزلزال هز الأرض… يا ترى هز قلبك؟🤔‼️
صحيت من النوم مفزوع صح ؟ قلبك كان بيدق بسرعة؟ حسيت لأول مرة إن الأرض اللي ماشي عليها كل يوم ممكن تهتز في لحظة؟
طيب… زي ما الزلزال صحاك من النوم، هو صحّى قلبك من الغفلة؟‼️
يا جماعة، الزلازل مش مجرد ظاهرة طبيعية وخلاص، دي من آيات ربنا اللي بيخوّف بيها عباده علشان يفوقوا ويرجعوا له.
ربنا قال:
﴿وَمَا نُرْسِلُ بِالْآيَاتِ إِلَّا تَخْوِيفًا﴾.
يعني الرسالة واضحة: ارجعوا لربنا قبل ما يفوت الأوان وانا اولكم .
اللي بقاله شهور أو سنين مش بيصلي… اصحى.
إيه مستني إيه؟ يمكن الزلزال اللي خوّفك النهارده يكون رسالة من ربنا ليك قبل ما تيجي اللحظة اللي مفيهاش رجوع.
واللي أكل حق أخوه، أو ظلم حد، أو خد فلوس مش من حقه… رد الحقوق لأصحابها قبل ما تيجي تقف قدام ربنا، وساعتها لا هتعرف تهرب ولا تعتذر.
واللي قاطع رحمه… صِل رحمك.
واللي عاق والديه… ارجع وبوس إيديهم واطلب رضاهم.
واللي عايش في معصية ومطمن إن لسه العمر طويل… مين قالك إن بكرة مضمون؟
إحنا لما حسينا بالأرض بتتحرك، كل واحد نسي العربية، والفلوس، والمنصب، والشهرة… وكل اللي كان بيفكر فيه: يا رب نجّينا.
طالما لسانك عرف يقول “يا رب” وقت الخوف، خليه يقولها كمان وقت الرخاء.
ما تخليش الزلزال يبقى مجرد حكاية تحكيها للناس أو فيديو تنشره على السوشيال ميديا.
خليه بداية جديدة.
ابدأ من النهارده.
حافظ على صلاتك.
تب إلى ربك.
سامح الناس.
رد المظالم.
اقفل باب الحرام.
وافتح صفحة جديدة مع الله.
يمكن الزلزال هز الأرض لدقايق…
لكن المصيبة الحقيقية إن القلب يفضل ساكن وما يتحركش لله.
اللهم أيقظ قلوبنا قبل أن يأتي يوم لا ينفع فيه ندم، واجعل ما نراه من آياتك سببًا في توبتنا ورجوعنا إليك.
عمرو حسن
