06/02/2024
👍
အင်ဂျင်ကူးလန့် အသုံးပြုရခြင်းရဲ့ ကောင်းကျိုးများ
ကားအင်ဂျင်ရဲ့ အအေးပေးစနစ်မှာ အင်ဂျင်ကူးလန့် (Coolant) ကို အရောင်အမျိုးမျိုးနဲ့ သုံးစွဲကြပါတယ်။ ယခင်ခေတ်ဟောင်းကားတွေမှာတော့ ကူးလန့်ကို အသုံးမပြုဘဲ ရေကိုဘဲအသုံးပြုကြပါတယ်။ ရေကိုအသုံးပြုတဲ့အခါ သံချေးတတ်ခြင်း၊ ရေဂျိုးတတ်ခြင်း စသည့်ပြစ်ချက်များကြောင့် အင်ဂျင်အအေးပေးစနစ်ရှိ ရေတိုင်ကီများ ချေးပိတ်ခြင်း၊ ရေလည်အုံဒလက်များ ပွန်းစားခြင်းစသည့် ပြဿနာများကိုကြုံတွေ့ရကာ အင်ဂျင်အပူလွန်ကဲမှု (အိုဗာဟိ – Overheat) ဖြစ်စေပါတယ်။
ဒါ့အပြင် ရိုးရိုးရေရဲ့ ရေဆူမှတ်က 100° C ဖြစ်ပြီး အင်ဂျင်ကူးလန့်ရဲ့ ရေဆူမှတ်က 107° C ~ 150° C ကြား (ကူးလန့်အမျိုးအစားနှင့် ရောစပ်ထားသည့်အချိုးအစားပေါ်မူတည်) ရှိပါတယ်။ ဒါကြောင့် ကူးလန့်ကိုအသုံးပြုခြင်းဖြင့် အင်ဂျင်အပူလွန်ကဲမှုကိုလည်း ကာကွယ်ရာရောက်ပါတယ်။ အင်ဂျင်အပူလွန်ကဲတဲ့အခါ အင်ဂျင်ရဲ့စွမ်းဆောင်ရည်ကို ဆိုးရွားစွာ ထိခိုက်စေပါတယ်။
အေးခဲတဲ့ဒေသများမှာ ရိုးရိုးရေကိုအသုံးပြုမိပါက 0° C မှာ ရေခဲကာ အအေးပေးစနစ်မှာ ပြဿနာတတ်စေပါတယ်။ အင်ဂျင်ကူးလန့်ကို အသုံးပြုခြင်းဖြင့် အေးခဲမှုကို ကာကွယ်ပေးကာ အအေးပေးစနစ်ရဲ့ စွမ်းဆောင်ရည်ကိုလည်း ထိန်းထားနိုင်ပါတယ်။ ဒါ့အပြင် သံချေးတတ်ခြင်းကို ကာကွယ်ပေးတဲ့အတွက် ရေတိုင်ကီချေးပိတ်ခြင်း၊ ရေလည်အုံပျက်စီးခြင်း၊ သာမိုစတတ် (Thermostat) ဂျန့်ဖြစ်ခြင်း စသည့် ပြဿနာများကိုလည်း လျော့ချပေးပါတယ်။
အင်ဂျင်ကူးလန့်မှာ အရောင်တွေပါဝင်တာကြောင့် ယိုစိမ့်မှုဖြစ်တဲ့အခါမှာလည်း အလွယ်တကူသိမြင်နိုင်ကာ ပြစ်ချက်ရှာဖွေဖို့ လွယ်ကူစေပါတယ်။ ဒါကြောင့် မော်တော်ကားအင်ဂျင်အအေးပေးစနစ်မှာ အင်ဂျင်ကူးလန့်ကိုသာ အသုံးပြုသင့်ပါတယ်။ ဒါပေမယ့် အင်ဂျင်ကူးလန့် အသုံးပြုတဲ့အခါ သတိထားရမည့်အချက်လေးတွေတော့ ရှိပါတယ်။
အင်ဂျင်ကူးလန့်ရဲ့အရောင်တွေကို ရောစပ်ပြီး အသုံးပြုလို့မရပါဘူး။ ဥပမာ – ကူးလန့်လျော့တဲ့အခါ အနီရောင်အသုံးပြုထားတဲ့ အင်ဂျင်က ကူးလန့်အနီရောင်ကိုသာ ဖြည့်ပေးသင့်သလို အစိမ်းရောင်အသုံးပြုထားတဲ့အင်ဂျင်က ကူးလန့်အစိမ်းရောင်ကိုသာ ဖြည့်ပေးသင့်ပါတယ်။ တကယ်လို့ အရောင်ပြောင်းလဲအသုံးပြုမယ်ဆိုရင် အင်ဂျင်အအေးပေးစနစ်အတွင်းမှာရှိတဲ့ ကူးလန့်အားလုံးကို ကုန်စင်အောင်ဖေါက်ချပြီးမှ အခြားအရောင်ကို အသုံးပြုသင့်ပါတယ်။
အင်ဂျင်ကူးလန့်မှာ Anti-Freeze (ကူးလန့်အဆီ) ပါဝင်မှုရာခိုင်နှုန်းကိုလည်း သတိထားသင့်ပါတယ်။ 20%, 30% နှင့် 50% Pre-mixed (ရောစပ်ပြီးသား) ကူးလန့်များကိုသာ အသုံးပြုသင့်ပြီး 100% (ကူးလန့်အဆီ) သီးသန့်ကို အသုံးမပြုသင့်ပါဘူး။ ကူးလန့်အဆီသီးသန့်အသုံးပြုရင် အင်ဂျင်အိုဗာဟိ (Engine Overheat) ဖြစ်စေနိုင်ပါတယ်။ ဒီအချက်ကိုလည်း သတိပြုစေချင်ပါတယ်။
အင်ဂျင်ကူးလန့်ကိုလည်း ကီလိုမီတာ (40,000) (သို့) ၂ နှစ်တစ်ကြိမ်အသစ်လဲပေးသင့်ပါတယ် (တချို့ကူးလန့်အမျိုးအစားများ SLLC (Super Long Life Coolant) တွေကို ၃၊ ၄ နှစ်ပေးတာတွေလည်း ရှိပါတယ်)။ ကူးလန့်ကို မလဲဘဲ သတ်မှတ်အချိန်ကာလထက် ကျော်လွန်အသုံးပြုမိပါက အရည်သွေးကျဆင်းကာ ကူးလန့်အနည်များဖြစ်စေပြီး ရေလိုင်းများမှာ ချေးပိတ်စေပါတယ်။ ဒါဆိုရင်လည်း အင်ဂျင်အပူလွန်ကဲမှုကို ဦးတည်စေတာကြောင့် အင်ဂျင်ကူးလန့်ကို ပုံမှန်စစ်ဆေးလဲလှယ်ပေးသင့်ပါကြောင်း တင်ပြလိုက်ပါတယ်။
#မူရင်းရေးသားသူအားcreditပေးပါသည်။
