15/11/2020
لديكور فن كامل ، وعلي قد ما بنشوف صور كتيرة لشكل تنظيم الغرف و لكن التنفيذ في البيت بيكون مختلف واحيانا مخيب للآمال . اقدر اقولك بكل ثقة ان دا بيحصل لاننا بنتجاهل عناصر كتيرة جدا مكملة ومهمة وبنركز بس على شكل الموبيليا و ألوانها .
هكلمك النهارده في بعض العناصر المهمة في الديكور، وهيفرقوا معاكي جدًا في شكل بيتك
1- متشتريش قشاية في البيت إلا لما تشوفي مساحة الشقة اللي إنتي هتعيشي فيها.صدقيني مهما كنتي حريصة هايطلعلك حاجة او اتنين يحسسوكي انك اتدبستي فيهم
2 - الأرضيات يُفضل إنها تكون أغمق من الجدران. ومتدهنيش الشقة إلا لما تختاري لون عفشك كله، أما لو كنتي مضطرة إنك تختاري لون الجدران الأول يبقى اعتمدي الألوان الحيادية، زي الأبيض وتنويعاته أو الأوف وايت. وفيما بعد ممكن تلوّني بعض الجدران ببعض الألوان على حسب احتياجاتك.
3_ لما تستقري على شقتك روحي وارفعي مقاساتها وتخيلي أماكن كل حاجة ومقاساتها، بحيث توفرلك مساحة للتحرك في البيت بحرية.
4 - الشقق الصغيرة هي دايمًا المشكلة، لو مفيش موبيليا على مقاسات شقتك أو كل حاجة كبيرة أوي، فكري جديًا في الموبيليا العمولة. اختاري الموديلات اللي تحبيها وخلي حد ينفذهالك بالمقاسات المناسبة لشقتك ولاحتياجاتك.
5 - إحنا شعب بيعشق النجف، وبشكل عام النجف فعلاً قطعة شيك وبتدي شكل حلو للبيت. لكن لازم تاخدي في اعتبارك التوازن ما بين 3 عناصر وإنتي بتنقي نجف بيتك: حجم النجفة، ارتفاع سقف الغرفة، مساحة الغرفة اللي هتتحط فيها النجفة. لو السقف ما بين 2.5 لـ 3 م، وطول الغرفة ما بين 4.5 لـ 6 م، وعرضها ما بين 3 لـ 4 م، يفضل نجفة واحدة بس بحجم متوسط أو اتنين بحجم صغير. لو المقاسات زادت عن كده ممكن تكبري شوية في حجمها.
6 - الستائر دايمًا يفضل إنها تكون سادة تمامًا وبألوان مختلفة عن لون العفش، لكن تظهره وتديه رونق
7- لو هتستعملي ورق حائط خدي بالك لو عفشك فيه ألوان كتيرة، خلي ورق الحائط بسيط في رسوماته وهادي، والعكس بالعكس، لو عفشك بلون واحد ومفيهوش نقشات ممكن تختاري ورق حائط بألوان متداخلة كتيرة
8 - الإضاءة السيئة بتزوّد إحساسك بالضيق والخنقة من الغرفة . اهتمي بوحدات الاضاءة الصناعية و زوديها على قد ما تقدري وفي المقابل استغلي أي مكان ممكن يجيلك منه ضوء النهار واحرصي عليه جدًا.
9 - متهمليش أبدًا أهمية وجود النباتات والزرع في بيتك، لأنه بيدي حياة للبيت وبينقي جو البيت جدًا
